【驚喜升級：Predator Freak+ FG 實測】
.
Predator 2021年度正式升級至Predator Freak+， 外型上Predator Freak+同上一代Predator Mutator 20+有點接近，不過細節位上卻大為不同。Predator貴為Adidas旗下以傳控為主打嘅波Boot，上一代Predator Mutator 20+ 的確有點失色，雖然佢用上新嘅倒刺科技，不過開鞋時間較長，亦需要更多適應時間。不過，於新一代嘅Freak+，三間相信吸收咗唔少球員同用家嘅意見，製作出一對相當令阿靴感驚喜嘅波Boot。
.
Predator Freak+ 最大嘅改動係鞋面嘅倒刺數量，佢由上代嘅406粒倒刺大大減少至225粒，倒刺長度則稍微加長，亦延伸至襪套位置。鞋內側同鞋外側嘅倒刺方向亦會有所唔同，內側倒刺會向內側彎入，而外側倒刺則會向外彎出，相信期望新嘅設計可以更輔助各位控球的狀況。
.
Predator Freak+ 鞋身同樣用上Primknit科技，因為較少嘅倒刺，整體質感相對上代更柔軟。此外，三間亦更新了Predator嘅鞋口位置，Predator Freak+ 現時轉為兩件式嘅襪套設計，鞋頭襪套會包裹著腳掌位置，而鞋踭襪套則會包裹著腳後踭嘅位置，新設計同以往嘅Predator及Ace嘅襪套式設計大為不同。至於視覺上，亦因為兩件式襪套設計，加上更突出嘅倒刺，Predator Freak+ 顯得更有侵略性。
.
阿靴就穿著過Predator Freak+實測及友賽，發揮比上代好。阿靴最滿意嘅係Predator Freak+嘅力量感與球感，特別於射門及長傳上，於唔使點開鞋嘅狀況之下，發揮係相當高質。
.
先講射門，Predator Freak+ 無鞋帶嘅設計，再配上較柔軟嘅鞋面，力量感相當充裕，而且容易食得應皮球，阿靴會認為Predator Freak+容易射到一啲較飄嘅波，做啱動作，皮球就可以射去期望嘅位置。至於腳內檔射門上，倒刺膠粒帶來相當強嘅摩擦力，Chok射上弧度亦會較明顯，而且力量感亦會剛剛好。
.
相對短傳，阿靴認為於長傳上，Predator Freak+更能發揮佢嘅優勢。於普通嘅長傳上，鞋面於改良過後，Predator Freak+ 嘅斬波係非常之去，倒刺膠粒除了提升到長傳嘅球感，亦提升到長傳嘅距離感，可以較輕鬆將波長傳往自己期望嘅位置。至於腳內檔嘅長傳，Predator Freak+ 於球感及力量感均出眾，倒刺膠粒同樣帶來更明顯嘅曲線。
.
短傳發揮上，阿靴認為傳球路線屬於穩定，傳送時亦會感受到倒刺膠粒嘅額外輔助。至於控球上，倒刺膠粒的確有唔少幫助，接應較遠嘅長傳會感覺到Predator Freak+ 黏下皮球嘅感覺，至於短傳嘅觸感上，也可以較輕鬆控往自己期望嘅方向。
.
盤球上Predator Freak+ 相對上代Predator Mutator 20+ 有所改善，原因係Predator Freak+擁有較少膠粒以及較柔軟嘅鞋面，令到觸球感覺較上代更為得心應手。之前阿靴就講到上代Predator Mutator 20+ 需要較長時間適應觸球嘅特別感覺，不過於Predator Freak+ 上則不用長時間嘅適應，而整體盤球發揮上阿靴係感到滿意。至於鞋釘上，FG版本就同上代 Mutator 20+ 一樣用上ControlFrame，帶俾大家啱啱好嘅抓地力。
.
舒適度上，Predator Freak+ 用上新嘅兩件式襪套設計，阿靴應為這個改善係非常重要。第一點係Predator Freak+ 會變得容易著好多，拉開開口抽著鞋尾就會著到；至於第二點，就係Predator Freak+ 於足弓位置嘅壓力感會相對上代少，縱然穿著初期足弓會有少許緊，但係適應時間會相對上代短，相信約一節練習嘅時間就能夠適應。
.
尺碼上，阿靴平時著開US8，Predator Freak+ FG著返US8就會啱啱好，至於鞋型上，Predator Freak+ FG鞋頭會較闊，而鞋身會係較貼，整體嚟講，阿靴會認為中至闊腳嘅波友會較為合適。
.
Predator Freak+ FG 實測報告：
盤球：●●●◐
控球：●●●●◐
短傳：●●●●
長傳：●●●●●
射門：●●●●●
舒適：●●●◐
保護：●●●●
*鞋釘唔算長，除真草場外，中至高質嘅仿真草亦會合適。
.
感謝adidashk提供嘅波Boot
.
--------------------------------------------------
【屎波裝備多Instagram】Follow: instagram.com/hkfootballreview
【波Boot實測】Adidas Top Sala Lux: https://youtu.be/R7Win_I5PQw
【波Boot實測】白飯魚: https://youtu.be/-dbvs0_YgiY
【波Boot比較】五對驚喜釘Boot: https://youtu.be/vzDRe25kkrM
Search